"ყველა არასაბანკო ფინანსურ ინსტიტუტს თამასუქის გამოშვების უფლება არ უნდა ჰქონდეს\"
25 ოქტომბერი, 2016

"რიკო კრედიტის" სამეთვალყურეო საბჭოს თავმჯდომარე ლაშა ნიკოლაიშვილი მიიჩნევს, რომ ყველა არასაბანკო ფინანსურ ინსტიტუტს თამასუქის გამოშვების უფლება არ უნდა ჰქონდეს. ასე გამოეხმაურა ნიკოლაიშვილი „ბიზნესკონტრაქტთან“ საუბარში „მიკროსაფინანსო ორგანიზაციების შესახებ“ კანონში მოსალოდნელ ცვლილებებს, რომელსაც ეროვნული ბანკი აპირებს.


დღეს უკვე გამოჩნდნენ კომპანიები, რომლებიც რესურსს 20%-ში იზიდავენ, ჩვენს კოპირებას აკეთებენ და შემდეგ თანხას 12%-ში გასცემენ, რაც რეალური პირამიდებია. ეს პირამიდები სრულ კრახს განიცდის, რადგან შეუძლებელია რესურსი 20%-ში მოიზიდო და შემდეგ 12%-იანი სესხი გასცეთ. რა თქმა უნდა, ეს ორგანიზაციები კონკურენციას გვიწევენ, კლიენტებს გადააქვთ იქ დეპოზიტები, მაგრამ ესენი აშკარა შპს-ები არიან, რომელთაც არანაირი კაპიტალი და რეგულაციები არ აქვთ და ვერც ეროვნული ბანკი აკეთებს რეგულაციას იქიდან გამომდინარე, რომ ამისთვის კანონი არ არსებობს. ეს უნდა დარეგულირდეს“, - განაცხადა ნიკოლაიშვილმა.

მისი აზრით, ფინანსური ინსტიტუტების მიერ თანხის მოზიდვა უნდა გამომდინარეობდეს კაპიტალის მოცულობიდან.

"ამის უფლება არ შეიძლება ყველას ჰქონდეს. უახლოეს მომავალში აუცილებლად იქნება სერიოზული პრობლემები. მთავარია, მოსახლეობა არ დაზარალდეს. სებ-ი რას მოიმოქმედებს, საქმის კურსში დეტალურად არ ვარ, მაგრამ ამ სფეროს ძალიან სერიოზული რეგულაცია სჭირდება - სავალუტო ჯიხურებიდან და ლომბარდებიდან დაწყებული, მიკროსაფინანსოებით დამთავრებული", - განაცხადა ნიკოლაიშვილმა და დასძინა, რომ უნდა იყოს შემუშავებული ერთიანი თამაშის წესები.

ცნობისთვის, „მიკროსაფინანსო ორგანიზაციების შესახებ“ კანონში შესატანი ცვლილებების პროექტზე ეროვნულმა ბანკმა მუშაობა დაასრულა, თუმცა დოკუმენტის დეტალებს ჯერ არ ასაჯაროებს.

ოქროს თამასუქი
sesxi